किमया आईची

चिमुकल्या देहाला
भेट देई श्वासांची
देई ओळख त्याला
नव्या एका सृष्टीची
अनोखी किमया ही
असे फक्त आईची

निरर्थक हुंकारांना
साथ देई शब्दांची
अल्लड विचारांना
देई गती स्वप्नांची

धगधगणार्‍या देहाला
गारवा देई मायेचा
कुडकुडणार्‍या मनाला
देई ऊब प्रेमाची
अनोखी किमया ही
असे फक्त आईची

उडू पाहणार्‍या पाखरांना
पंख देई सामर्थ्याचे
निराशल्या मनाला
देई उभारी विश्वासाची

जग जिंकूनी सारे
व्यथा काय सिकंदराची
स्वामी असूनी जगताचा
देवा उपाधी भिकार्‍याची
भूक त्यांनाही बघा
असे फक्त आईची