गुढीपाडवा

धरणीस पांघराया नवा शेला
शिशिर सरूनी वसंत आला
कोकीळेच्या सुरांसोबत
दारी चैत्र पाडवा आला...

आली पहाट सोनेरी
ब्रम्हध्वज चढला नभी
तनी मनी बरसती
चैतन्याच्या सरी...

निळ्या निळ्या आभाळी
बघा चढली ही गुढी
हिरवा साज चढवूनी
राहे थाटात उभी...

कडुनिंबासोबत राही
साखरेची गाठी
नव्या स्वप्नांनी लिहू
नववर्षाची पाटी...

नवा बहर, नवा मोहर
नवी दिशा, नवी आशा
उभारूनी गुढी मराठी अस्मितेची
वाढवू शान आज परंपरेची...